அரச நிறுவனங்களுக்கு எதிராக, இரண்டே வாரங்களில் 185 முறைப்பாடுகள் பதிவு

அரச நிறுவனங்களுக்கு எதிராக, கடந்த நான்கு வருட காலப் பகுதியில் மட்டும் 185 முறைப்பாடுகள் பதிவு செய்யப்பட்டுள்ளதாக தெரிவிக்கப்பட்டுள்ளது.

அரச நிறுவனங்களில் இடம்பெற்றதாக கூறப்படும் ஊழல்களை விசாரிப்பதற்கு நியமிக்கப்பட்ட ஜனாதிபதி ஆணைக்குழுவிற்கு, இரண்டு வாரங்களுக்குள் இந்த முறைப்பாடுகள் கிடைத்துள்ளன.

கடந்த 2015 ஜனவரி 14 ஆம் திகதி முதல், டிசம்பர் 31 ஆம் திகதி வரையான 4 வருடங்களுக்குள் அரச நிறுவனங்களில் இடம்பெற்றதாகக் கூறப்படும் ஊழல் செயற்பாடுகள், நிறுவன நம்பிக்கையை மோசடி செய்தல், முறையற்ற வளப் பாவனை தொடர்பில் மக்களின் முறைப்பாடுகளைப் பெற்று, அவை தொடர்பில் விசாரித்தல் என்பன ஜனாதிபதி ஆணைக்குழுவின் பொறுப்பாகும்.

இதற்கமைய ஆணைக்குழுவுக்கு கிடைக்கப்பெற்ற முறைப்பாடுகள் குறித்து, உரிய விசாரணைகள் இடம்பெற்று தகுந்த தண்டனை வழங்கப்பட வேண்டும் என, முறைப்பாட்டாளர்கள் கோரிக்கை விடுத்துள்ளனர்.