வேடிக்கை கருத்தை வெளியிட்ட கமகே - நாட்டின் எதிர்க்கட்சித் தலைவர் யார்? - தொடரும் நகைச்சுவைகள் .....

நாட்டில் எதிர்க்கட்சித் தலைமைப் பதவி தொடர்பிலான குழப்பம் நிலவுகின்றமை காரணமாக, அதற்குரிய முடிவு வெளியிடப்படாத சூழலில், அப்பதவி ஸ்ரீலங்கா சுதந்திரக் கட்சிக்கே கிடைக்கப் பெறவேண்டும் என்று வலியறுத்தபட்டுள்ளது.

இந்தக் கோரிக்கையை, ஸ்ரீலங்கா சுதந்திரக் கட்சியின் உப தலைவரும் பாராளுமன்ற உறுப்பினருமான பியசேன கமகேயும் தெரிவித்துள்ளார்.

உண்மையில் சமீபகாலமாக நாட்டில் நடைபெறும் அரசியல் தந்திரங்கள், கல்வி நிலையில் வெகுவாக பின்தள்ளி இருப்பவர்கள் மத்தியில்கூட மிகுந்தவிசனத்தை உருவாக்கியுள்ளது. நாட்டின் அரசியல்வாதிகள் ஆளுக்கொரு கருத்தை கூறிவருவதனால் மக்களிடையே இந்த நாடு எங்கே போகிறது? என்ற நம்பிக்கையீனம் உருவாகியுள்ளது.

ஒரு நாட்டின் தலைவர் அங்கத்துவம் கொண்ட கட்சியினருக்கே எதிர்கட்சி பதவியும் வழங்கப்படவேண்டும் என்று கூறுவது, உலக வரலாற்றிலேயே வேடிக்கையான கருத்தாகும்.

இது இவ்வாறு இருக்க, நிமல் சிறிபால டி சில்வாவையோ அல்லது துமிந்த திஸாநாயக்கவையோ எதிர்க்கட்சி தலைவராக நியமிக்குமாறுகோரி சபாநாயகருக்கு பிரேரணையொன்றை முன்வைக்க ஸ்ரீலங்கா சுதந்திரக் கட்சி பாராளுமன்ற உறுப்பினர்கள் தீர்மானித்துள்ளதாக பியசேன கமகே தெரிவித்துள்ளார்.

மேலும் பாராளுமன்றத்திலுள்ள எதிர்க் கட்சிப் பதவி ஸ்ரீலங்கா சுதந்திரக் கட்சிக்கே கிடைக்கப் பெற வேண்டும் என்றும் பொதுஜன பெரமுனவின் உறுப்புரிமையைப் பெற்றுள்ள மஹிந்த ராஜபக்ஷவுக்கு அப்பதவியை வழங்குவது சட்டவிரோத நடவடிக்கை எனவும் அவர் மேலும் குறிப்பிட்டுள்ளார்.

ஆனால், பொதுஜன பெரமுனவில் மஹிந்த ராஜபக்ஷ உறுப்புரிமையை பெறவில்லை என்று, மஹிந்த அணியினர் கூறிவருவது மேலும் ஒரு வேடிக்கை மிகு கருத்து என அரசியல் ஆய்வாளர்கள் கூறுகிறார்கள். எது எப்படியோ எதிர்கட்சி தலைவர் தொடர்பான சிக்கல்பாடு ஜனநாயக முறையில் கிடைக்க வேண்டும் என்பதுதான் நிதர்சனம்.