விசேட தேவையுடைய மாணவர்களின் கல்வி நடவடிக்கையில் கவனம் எடுக்கப்படுமா?

விசேட தேவையுடைய மாணவர்களுக்கான கற்பித்தல் செயற்பாடுகளை மேற்கொள்வதற்கு தேர்ச்சி பெற்ற ஆசிரியர்களின் பற்றாக்குறை நிலவுகின்ற பிரச்சினை இருப்பது, கிளிநொச்சி வலயக்கல்வி பணிப்பாளர் ஜோன் குயின்ரஷினால் சுட்டிக்காட்டப்பட்டுள்ளது.

தகவல் அறியும் உரிமை சட்டத்தை பயன்படுத்தி வடக்கு மாகாணத்தில் கல்வி பறிலும் மாணவர்களின் தொகை மற்றும் அவர்களுக்கு கற்பித்தலை மேற்கொள்ளும் ஆசிரியர்கள் தொடர்பில் வினவப்பட்டபோதே, குறித்த தகவல் வெளியாகியுள்ளது.

அத்துடன், விசேட தேவையுடைய மாணவர்களுக்கான கற்பித்தல் செயற்பாடுகளை முன்னெடுப்பதில் வடக்கு மாகணத்தில் பல்வேறு கல்வி வலையங்களில் நிலவும் ஆசிரயர்களின் தேவைப்பாடுகள் தொடர்பில், மேலும் சில விபரங்கள், குறித்த தகவல் அறியும் சட்டம் மூலம் ஊடாக வெளிக்கொணரப்பட்டுள்ளன.

இந்த தகவல் அறியும் சட்டம் ஊடாக வடமராட்சி , தென்மராட்சி , தீவகம், கிளிநொச்சி மற்றும் துணுக்காய் ஆகிய ஐந்து கல்வி வலயங்கள் குறித்த விபரங்களை வெளிப்படுத்தியுள்ளன.

ஏனைய யாழ்ப்பாணம், வலிகாமம், முல்லைத்தீவு, மன்னார், மடு, வவுனியா வடக்கு மற்றும் வவுனியா தெற்கு ஆகிய ஏழு கல்வி வலயங்களிடம் வினவிய போதிலும், இன்னும் உரிய தகவல்வெளிப்படுத்தல் கிடைக்கப்பெறவில்லை.

இதன்படி யாழ்ப்பாணத்தின் - தீவகக்கல்வி வலயத்தில் 152 விசேட தேவையுடைய மாணவர்கள் கல்வி கற்கின்ற நிலையில், அவர்களுக்கு கற்பிக்கவென பயிற்றப்பட்ட 06 ஆசிரியர்கள் உள்ளதாக தீவக கல்வி வலயத் தகவல்கள் தெரிவிக்கின்றன.

முல்லைத்தீவு - துணுக்காய் கல்வி வலயத்தில் 42 விசேட தேவையுடைய மாணவர்கள் கல்வி கற்பதாகவும், அவர்களுக்கு கற்பிக்கவென பயிற்றப்பட்ட 08 ஆசிரியர்கள் உள்ளனர் என சம்மந்தப்பட்ட அதிகாரி தகவல் வெளிப்படுத்தியுள்ளார். வடமராட்சி கல்வி வலயத்தில் 48 விசேட தேவையுடைய மாணவர்களுக்கு கல்வி புகட்ட, 08 பயிற்றப்பட்ட ஆசிரியர்கள் உள்ளதாக வடமராட்சி கல்வி வலயப் பணிப்பாளர் யோ. ரவீந்திரன் தெரிவித்துள்ளார்.

மேலும், தென்மராட்சி கல்வி வலயத்தில் 27 விசேட தேவையுடைய மாணவர்கள் கல்வி கற்கின்றபோதில் அவர்களுக்கான கற்பித்தலை 05 ஆசிரியர்கள் முன்னெடுக்கிறார்கள்.

இதனிடையே யுத்தம் மற்றும் பிறவியில் ஏற்பட்ட குறைபாடுகள் காரணமாக வடக்கு மாகாணத்தில் விசேட தேவையுடைய மாணவர்களின் எண்ணிகை சமீமகாலமாக அதிகரித்துள்ளமை கவனிக்கத்தக்கது.