குமரப்பா-புலேந்திரனுக்கு தூபி அமைப்பதில் த.தே.கூ விற்கும் வல்வெட்டித்துறையினருக்குமிடையே மோதல்.

விரட்டியடிக்கப்பட்ட சிவாஜி.

இந்திய அமைதிப்படையினரால் கைது செய்யப்பட்ட பின்னர் தற்கொலை செய்து கொண்ட குமரப்பா – புலேந்திரன் உட்பட்டோரின் நினைவால் வல்வெட்டித்துறை தீருவில் பகுதியில் தூபி ஒன்று அமைக்கப்பட்டிருந்தது. அத்தூபியானது கடந்த ஆட்சியாளர்கள் காலத்தில் இடித்து நொருக்கப்பட்டிருந்தது.

இந்நிலையில் குறித்த தூபியை மீளக்கட்டுவது என்ற தீர்மானம் வல்வெட்டித்துறை நகர சபையில் எடுக்கப்பட்டிருந்தது. அத்தீர்மானத்தில் புலிகளுக்கு தனியானதோர் தூபியும் மாற்று இயக்கத்தினர் மற்றும் பொதுமக்களுக்கு பிறிதோர் தூபியும் கட்டுவதென்ற தீர்மானம் நிறைவேற்றப்பட்டிருந்தது.

மாற்று இயக்கத்தினருக்கு வல்வெட்டித்துறையில் தூபி ஒன்றை கட்ட முடியாது என அனந்தராஜா தலைமையில் இயங்குகின்றது சுயேட்சைக் குழுவினர் எதிர்ப்பு தெரிவித்து வந்தனர். இந்த எதிர்ப்புக்கு பின்னால் பிறிதொரு நோக்கமும் இருந்தது. அந்த நோக்கம் யாதெனில் தமிழ் தேசியக் கூட்டமைப்பினால் நிர்வகிக்கப்படுகின்ற மாநகர சபையினால் புலிகளுக்கு தூபி கட்டப்படக்கூடாது என்பதும் புலிகளின் மொத்த வியாபாரிகளாக வல்வெட்டித்துறையினரே அமையவேண்டும் என்பதுமாகும்.

இந்நிலையில் இன்று காலை ஏலவே திட்டமிட்டதுபோல், சிவாஜிலிங்கம் தலைமையிலானோர் தூபிக்கான அடிக்கல்நாட்ட முற்பட்டபோது, சுயேட்சைக்குழுவினர் தமது எதிர்ப்பை வெளிக்காட்டினர். அங்கு பலத்த வாதப்பிரதிவாதங்கள் இடம்பெற்றது. இறுதியாக சிவாஜிலிங்கம் குழுவினர் தூபிக்காக வெட்டிய கிடங்கை மூடும் நிலைக்கு தள்ளப்பட்டனர்.

இச்சந்தர்பத்தில் அங்கே கூவிக்கொண்டு பொலிஸ் வண்டியொன்று வந்தது. அவ்வண்டியில் வந்திறங்கினார் வல்வெட்டித்துறை பொலிஸ் நிலையப் பொறுப்பதிகாரி பிரதம பரிசோதகர் குமாரசேன. அவர் குறித்த இடத்தில் பயங்கரவாதிகளுக்கு சிலை அமைக்க முடியாது என்ற நீதிமன்ற தடை உத்தரவை எடுத்து வந்திருந்தார். அனைவரும் நவ துவாரங்களையும் பொத்துக்கொண்டு அங்கிருந்து விலத்திச் செல்லவேண்டியேற்பட்டது .

மக்களின் தேவைகளை கிடப்பில்போட்டுவிட்டு புலிகளுக்கு விழா எடுப்பதிலேயே தங்களின் அரசியல் இருப்பை தக்கவைத்துக்கொள்ள முடியும் என்று செயல்படுகின்ற அரசியல்வாதிகளுக்கு , குமாரசேனா போன்ற அதிகாரிகள் மிகவும் துன்பகரமானவர்களாகவே எதிர்காலத்தில் அமையப்போகின்றனர் என்பது உறுதி.