விக்கிக்கு உரியநேரத்தில் தக்க பதிலடி கொடுப்பாராம் சம்பந்தன்!

தமிழ் தேசியக் கூட்டமைப்பினால் அரசியல் அறிமுகம் செய்துவைக்கப்பட்டவர்தான் முன்னாள் நீதியரசர் சி.வி. விக்னேஸ்வரன். தமிழ் தேசியக் கூட்டமைப்பிற்கும் விக்கினேஸ்வரனுக்குமான உறவு விரிசலடைந்து தற்போது அரசியல் எதிரிகள் என்ற நிலையை எட்டியுள்ளது.

தமிழ் தேசியக் கூட்டமைப்பினை நேரடியாகவும் மறைமுகமாகவும் தாக்கிவரும் சி.வி.விக்னேஸ்வரன் தமிழ் தேசியக் கூட்டமைப்பிற்கு எதிராக தோற்றம் பெற்றுள்ள தமிழ் மக்கள் பேரவையின் பணிமனைத் திறப்பு விழாவில் கலந்து கொண்டிருந்தார். அங்கு உரையாற்றிய அவர், தமிழ்த் தேசியக் கூட்டமைப்பின் தலைமைத்துவம் தோல்வியடைந்து விட்டதாகத் தெரிவித்திருந்தார்.

அத்துடன், அரசியலில் தனக்கு முன்பாக 4 தெரிவுகள் இருப்பதாகவும் கூறியிருந்தார். இது தொடர்பில் தமிழ்த் தேசியக் கூட்டமைப்பின் நிலைப்பாடு என்னவென்று தமிழ் தேசியக் கூட்டமைப்பின் தலைவர் சம்பந்தன் அவர்களிடம் கேட்கப்பட்டபோது :

'விக்னேஸ்வரனை வடக்கு முதலமைச்சராகக் களமிறக்கியது தமிழ்த் தேசியக் கூட்டமைப்பு. முதலமைச்சர் வேட்பாளராகக் களமிறக்கி அவரை முதலமைச்சராக்கியது வரையில் தமிழ்த் தேசியக் கூட்டமைப்பு மாத்திரம்தான் பங்களிப்புச் செய்தது என்பதை அவர் கவனத்தில் கொள்ளவேண்டும்.

இந்தநிலையில், கூட்டமைப்பின் தலைமையை விமர்சித்து அவர் தனது பக்க நியாயங்களை மாத்திரம் முன்வைத்துள்ளார். மறுபக்க நியாயங்களை நாம் முன்வைக்கவேண்டும்.

அதனை நாம் அவசரப்பட்டு முன்வைக்க முடியாது. ஆற அமர்ந்து அவர் முன்வைத்த கருத்துக்களை அலசி ஆராய்ந்து தக்க நேரத்தில் உரிய பதிலை வழங்குவேன்' – என்றார்.