சர்வதேச விசாரணைக்கு இடமளிக்கப்பட மாட்டாது - கமரூனின் கோரிக்கையை நிராகரிக்கிறார் பஸில்!

இலங்கையின் இறுதிக் கட்டப் போரின்போது, நடந்ததாகக் கூறப்படும் போர்க்குற்றங்கள் தொடர்பில் சர்வதேச விசாரணை நடத்தப்பட வேண்டும் என பிரித்தானியப் பிரதமர் டேவிட் கமரூன் விடுத்துள்ள கோரிக்கையை இலங்கை நிராகரித்துள்ளது.

ஜனாதிதபி மகிந்த ராஜபக்ஷவின் சகோதரரும் பொருளாதார அபிவிருத்தி அமைச்சருமான பஸில் ராஜபக்ஷ அவ்வாறான விசாரணைக்குஇடமளிக்கப்பட மாட்டாது என்று கூறியுள்ளார்.

இலங்கை மீதான குற்றச் சாட்டுக்கள் தொடர்பில் அரசாங்கம் சுயாதீன விசாரணையொன்றை நடாத்த வேண்டுமென்று பிரித்தானியப் பிரதமர் கமரூன் கோரிக்கை விடுத்துள்ளார்.

எதிர்வரும் மார்ச் மாதத்துக்குள் அவ்வாறான விசாரணைப் பொறிமுறையொன்று அமைக்கப்படாவிட்டால், சர்வதேச விசாரணையை நடாத்துமாறு ஐநாவிடம் கோரிக்கை விடுக்கவுள்ளதாகவும் கமரூன் காலக்கெடு விடுத்துள்ளார்.

இலங்கையில் நடைபெற்றுவரும் பொதுநலவாய தலைவர்களின் உச்சிமாநாட்டின்போது, வடக்கே யாழ்ப்பாணம் சென்று தமிழ்த் தலைவர்களைச் சந்தித்து நாடுதிரும்பியுள்ள பிரித்தானியப் பிரதமர் நேற்று (15) வெள்ளிக்கிழமை இலங்கை ஜனாதிபதி மகிந்த ராஜபக்ஷவையும் சந்தித்து சுமார் ஒரு மணி நேரம் பேச்சுவார்த்தை நடாத்தினார் என்பதும் குறிப்பிடத்தக்கது.