மகள் ஜேர்மனியில் பெற்றோர் முதியோர் இல்லத்தில்

பெற்று வளர்த்த ஒரே ஒரு மகள் ஜேர்மன் நாட்டில் வாழ்ந்து வரும்போது அவரது பெற்றோர்கள் கைதடி அரச முதியோர் இல்லத்தில் இணைக்கப்பட்டு தங்கியுள்ளனர்.

சாவகச்சேரி, நுணாவில் மேற்கைச் சேர்ந்தவர்களான பொன்னம்பலம் வீரசிங்கம் (வயது - 80), அவரது மனைவி வீரசிங்கம் ராஜேஸ்வரி (வயது - 60) உடையவர்களது ஒரே ஒரு மகள் கணவன் மற்றும் 2 பிள்ளைகளுடன் ஜேர்மனியில் வாழ்ந்து வந்து வருவதுடன் அங்கிருந்து பெற்றோருக்கு பணம் அனுப்பி உறவினர்கள் மூலம் தனது பெற்றோரைப் பராமரித்து வந்த நிலையில் இவரது கணவன் திடீரென இறந்து போனார். இதனால் இவரது குடும்பத்தில் நெருக்கடி தோன்றியதனால் மகள் பெற்றோருக்கு பணம் அனுப்புவது தடைப்பட்டது.

நுணாவில் சந்திக்கு அண்மையில் உள்ள பாழடைந்த வீடு ஒன்றில் மிகவும் கஷ்டமான சூழலில் வாழவேண்டிய இக்கட்டான நிலைக்கு தள்ளப்பட்டு இருந்தவர்களின் நிலையை அறிந்த அப்பகுதி கிராம அலுவலரும் சமூகசேவை உத்தியோகத்தரும் இணைந்து இவர்களை கைதடி முதியோர் இல்லத்திற்கு நேற்று கொண்டுவந்து சேர்த்துள்ளதுடன் இது பற்றி ஜேர்மனில் உள்ள மகளுக்கும் அறிவிக்கப்பட்டுள்ளது.