வெளிநாடுகளில் இலங்கையர்கள் புரியும் குற்றத்திற்கு அரசு பொறுப்பல்ல: டிலான் பெரேரா!

வெளிநாடுகளில் தொழில்புரியும் இலங்கையர்கள் அந்தநாடுகளில் புரியும் குற்றச் செயல்களுக்கு இலங்கை அரசாங்கம் ஒருபோதும் பொறுப்பேற்கமாட்டாது என அபு தாபியில் இலங்கையர் ஒருவருக்கு மரண தண்டனை விதிக்கப்பட்டுள்ளமை தொடர்பில் கருத்து வெளியிடுகையில் வெளிநாட்டு வேலைவாய்ப்பு மற்றும் நலன்புரி அமைச்சர் டிலான் பெரேரா தெரிவித்துள்ளார்.

மத்திய கிழக்கு நாடுகளில் தொழில்புரியச் சென்று குற்றச் செயல்களில் ஈடுபட்ட தண்டனை அனுபவித்து வரும் பல தொழிலாளர்களின் குடும்பங்களிடமிருந்து எமது அமைச்சுக்கு தினமும் பல கடிதங்கள் வந்தவண்ணமுள்ளன. இருப்பினும் அவர்கள் தொழில்புரியும் நாடுகளில் உள்ள சட்டவிதிமுறைகளை மீறும்பட்சத்தில் அதுவிடயத்தில் எம்மால் தலையிட முடியாது எனக் குறிப்பிட்டுள்ளார்.

கொலைக் குற்றம் சுமத்தப்பட்டவர்களை மரண தண்டனையிலிருந்து பாதுகாக்கவும் எம்மால் முடியாது என குறிப்பிட்ட அமைச்சர் இருப்பினும் வெளிநாடுகளில் தொழில்புரியும் இலங்கையர் எவரும் அங்கு பிரச்சினைகளை எதிர்நோக்கினால் அவர்களுக்கு தேவையான உதவிகளை வழங்குமாறு அங்குள்ள இலங்கை தூதரகங்களுக்கு அறிவுறுத்தியுள்ளோம் என அமைச்சர் டிலான் பெரேரா தெரிவித்தார்.