த.தே.கூட்டமைப்பின் அரசியல் வால்தான் ஸ்ரீலங்கா முஸ்லிம் காங்கிரஸ்! - முஸம்மில்.

புலிகளின் பயங்கரவாத நடவடிக்கை காரணமாக கிழக்கு மாகாண முஸ்லிம் மக்கள் அதிகளவில் பாதிப்புக்குள்ளான போதும், அதனை மறந்து ஸ்ரீலங்கா முஸ்லிம் காங்கிரஸ் தமிழ்த் தேசியக் கூட்டமைப்பின் அரசியல் வால் போன்று செயற்பட்டுவருகின்றது என, தேசிய சுதந்திர முன்னணியின் ஊடகப் பேச்சாளர் மொஹம்மட் முஸம்மில் தெரிவித்துள்ளார்.

பத்தரமுல்லையில் அமைந்துள்ள கட்சியின் தலைமையகத்தில் நடைபெற்ற செய்தியாளர் மாநாட்டில் கலந்துகொண்டபோதே இவ்வாறு தெரிவித்துள்ளார்.

அவர் அங்கு மேலும் தெரிவிக்கையில், மறைந்த தலைவர் அஷ்ரப் வடக்கு, கிழக்கு மாகாணங்கள் இணையக்கூடாது என்பதில் உறுதியாக இருந்தார். அதேபோல் வரதராஜ பெருமாள் ஈழப் பிரகடனத்தை விடுத்ததும் அதனை எதிர்த்தவர். ஆனால் தற்போது அவரின் பாதையிலிருந்து விலகி, ஸ்ரீலங்கா முஸ்லிம் காங்கிரஸ் கட்சியை பிரிவினைவாதத்தை நோக்கி அதன் தற்போதைய தலைமைத்துவம் இழுத்துச் செல்கின்றது என அவர் தெரிவித்துள்ளார்.

மேலும் அண்மையில் வடக்கு, கிழக்கில் தமிழ் முஸ்லிம் மக்களின் காணிகளை இராணுவத்தினர் சுவீகரிப்பதாக தமிழ்த் தேசியக் கூட்டமைப்பின் கூட்டமைப்பின் எம்.பி. மாவை சேனாதிராஜா கூறியிருந்தார். அப்போது அதற்கு ஆதரவாக ஸ்ரீலங்கா முஸ்லிம் காங்கிரஸின் செயலாளர் நாயகமும் முஸ்லிம்களின் காணிகள் அபகரிக்கப்படுவதாக தெரிவித்தார். இதனை பார்க்கும்போது ஸ்ரீலங்கா முஸ்லிம் காங்கிரஸ் தமிழ்த் தேசியக் கூட்டமைப்பின் அரசியல் வால் போன்று செயற்பட்டுவருகின்றது.