காதலிப்பதாகக் கூறி யுவதியை கொன்று கிணற்றுக்குள் போட்ட இளைஞன் கைது! மாங்குளத்தில் சம்பவம்!

மே மாதம் 24ஆம் திகதியன்று, முல்லைத்தீவு மாங்குளம் பிரதேசத்தில் கிணற்றுக்குள் இருந்து சடலமாக மீட்கப்பட்ட பெண்ணின் கொலைச் சம்பவத்துடன் தொடர்புடைய சந்தேக நபர்கள் இருவரையும் கைது செய்துள்ளதாக பொலிஸார் தெரிவித்துள்ளனர்.

சம்பவத்தில் உயிரிழந்த கிளிநொச்சி கிருஷ்ணபுரத்தைச் சேர்ந்த துரைசாமி சரோஜா 25 வயதுடைய யுவதி, குறித்த இரு சந்தோக நபர்களாலும் கொலை செய்யப்பட்டார் என தெரிவிக்கப்படுகின்றது.

சம்பவம் தொடர்பாக தெரியவருவதாவது, மேற்படி யுவதியை காதலிப்பதாகக் கூறி வந்த இளைஞன் அவரை திருமணம் முடிப்பதாக வாக்குறுதி வழங்கி குறித்த இடத்திற்கு வருமாறு அழைத்துள்ளார். யுவதி அங்கு சென்றதையடுத்து, தனது நண்பனுடன் சேர்ந்து யுவதியை பாழடைந்த வீட்டுக்கு அழைத்துச் சென்ற காதலன் பின் தனது நண்பனுடன் இணைந்து காதலியை வல்லுறவுப்படுத்த முயன்றுள்ளார்.

இதற்கு குறித்த யுவதி எதிர்ப்புத் தெரிவித்ததையடுத்தே சந்தேக நபர்கள் இருவருமாக சேர்ந்து யுவதியை அடித்துக் கொலை செய்த பின்னர் சடலத்தை கல்லுடன் கட்டி கிணற்றுக்குள் போட்டுள்ளனர் என பொலிஸார் தெரிவித்துள்ளனர்.

சந்தேகநபர்கள் தொடர்ந்து விசாரணைக்குட்படுத்தப்பட்டு வருவதாகவும் இன்று முல்லைத்தீவு நீதவான் முன்னிலையில் அவர்கள் ஆஜர்படுத்தப்படுவர் எனவும் பொலிஸார் தெரிவித்துள்ளனர்.