தலையை மொட்டையடித்துக் கொண்டு பிரான்ஸில் மறைந்திருக்கும் எக்னெலிகொடவை இலங்கைக்கு கொண்டு வரவேண்டும்.

லங்கா ஈ நியூஸ் செய்திச்சேவையின் ஊடகவியலாளரான பிரகீத் எக்னெலிகொட, தலையை மொட்டையடித்துக் கொண்டு பிரான்ஸில் மறைந்திருந்து தாய் நாட்டுக்கு எதிராக செயற்படுகின்றார் எனவும், அவரை இலங்கைக்கு கொண்டு வருவதற்கான நடவடிக்கைகளை பாதுகாப்பு தரப்பினரும் உளவுப் பிரிவினரும் மேற்கொள்ள வேண்டுமென அனுறுத்திக பெர்னாண்டோ பாராளுமன்றத்தில் தெரிவித்தார்.

இது தொடர்பில் அவர் மேலும் கருத்து தெரிவிக்கையில் இணையத் தளங்களை பயன்படுத்தி எக்னெலியகொடவின் மனைவியும் வேறு பலரும் என் மீதும் அரசின் மீதும் பொய்யான குற்றச்சாட்டுக்களை வெளியிட்டு எனது பெயருக்கு களங்கத்தை ஏற்படுத்தி வருவதாக பராளுமன்றத்தில் நேற்று தெரிவித்தார்.

அவர் மேலும் தெரிவிக்கையில், நான் அண்மையில் பிரான்ஸுக்கு சென்றபோது எனது பாடசாலை நண்பரான மஞ்சுளவை என்னை சந்தித்தேன். இதன் போது தலையை மொட்டையடித்து ஒருவரை எனக்கு அவர் காண்பித்து அவர்தான் எக்னெலியகொட எனத் தெரிவித்தார். ஆனால் அந்நபர் என்னோடு பேசவில்லை.

அதேபோன்று ஜெனீவாவில் இலங்கைக்கு எதிராக இடம்பெற்ற ஆர்ப்பாட்டத்தில் தலைப்பாகை கட்டிக் கொண்டு சுனந்த தேசப்பிரிய காணப்பட்டார். அவர் அருகில் எக்னெலியகொட மொட்டையடித்து காணப்பட்டார்.

எக்னெலியகொடவின் மனைவி சந்தியா, உண்மையில் நாட்டை நேசிப்பவரானால் இந்த கருத்தை வெளியிட்ட என்னிடம் இவ்விடயம் தொடர்பில் வினவியிருக்க வேண்டும். அதனை விடுத்து ஊடகங்களுக்கு கருத்துக்களை வெளியிடுவது, வெளிநாடுகளுக்கு தகவல்களை தெரிவிப்பது வேதனைக்குரிய தாய் நாட்டுக்கு எதிரான செயலாகும். யுத்த காலத்திற்கு பின்னர் இப்பெண்மணி இலங்கைக்கு எதிராக கருத்துக்களை உள்நாட்டிலும் வெளிநாட்டிற்கும் தெரிவித்தவர் என அவர் மேலும் தெரிவித்தார்.