இலங்கைக்கான பான் கீ மூனின் நிபுணர் குழு: ரஷ்யா கண்டனம்

இலங்கையில் இடம்பெற்றதாக கூறப்படும் போர்க்குற்றம் மற்றும் மனித உரிமை மீறல்கள் தொடர்பாக ஐ.நா.பொதுச் செயலாளர் பான் கீ மூன் நியமித்துள்ள நிபுணர்கள் குழுவுக்கு, ரஷ்யா கண்டனம் தெரிவித்துள்ளது. இது தொடர்பாக ரஷ்யாவின் வெளிவிவகார அமைச்சு அறிக்கை ஒன்றை வெளியிட்டுள்ளது.

அவ்வறிக்கையில் இவ்வாறான குழு ஒன்று நியமிக்கப்படும் பட்சத்தில் பான் கீ மூன், ஐ.நா.பாதுகாப்பு சபையில் அல்லது பொதுச்சபையில் யோசனை சமர்ப்பித்து அவர்களின் அலோசனையை பெற்றிருக்கவேண்டும். ஆனால் அவர் அவ்வாறு செய்யத் தவறிவிட்டார் என சுட்டிக்காட்டப்பட்டுள்ளது.

ஆனால் நியமிக்கப்பட்ட குழுவானது இலங்கையின் யுத்த குற்றச் சாட்டுக்கள் தொடர்பாக விசாரணைகளை நாடத்தாது எனவும் சர்வதேச மனித உரிமை சட்டங்களுக்கு எதிரான வன்முறைகள் மற்றும் மனித உரிமை மீறல்கள் குறித்து பான் கீ மூனுக்கு ஆலோசனையை மாத்திரமே வழங்கும் என ஐ.நா. சபை தெரிவித்துள்ளது.

எனினும் இந்த குழு ஐக்கிய நாடுகளின் அதிகாரிகள் அல்லது இலங்கை அதிகாரிகளின் அனுமதி இன்றி நியமிக்கப்பட்டுள்ளது. எனவே ஐக்கிய நாடுகள் சபையின் தலைமை அதிகாரி என்ற வகையில் பான் கீ மூன் தமது அதிகாரத்தையும், பொறுப்பையும் மீறியிருப்பதாகவும், இவ்வாறான குழு ஒன்று பான் கீ மூனுக்கு தேவை அற்றது என்றும் ரஷ்யா அந்த அறிக்கையில் குறிப்பிடப்பட்டுள்ளது.

எவ்வாறாயினும் யுத்த காலத்தில் இடம்பெற்றதாக கூறப்படும் யுத்த குற்றங்கள் மனித உரிமை மீறல்கள் உள்ளிட்ட வன்முறை சம்பவங்கள் குறித்து விசாரணை நடத்தும் பொறுப்பு இலங்கை அரசாஙகத்திடமே காணப்படுகிறது.

குறிப்பிட்ட குழு இலங்கையினுள் நுழைவதற்கு அனுமதி வழங்கப்பட மாட்டாது என இலங்கை அரசாங்கம் அறிவித்துள்ள நிலையில் ஐ.நா.சபையின் நிபுணர்கள் குழு இலங்கைகான விஜயத்தை மேற்கொள்ள மாட்டாது என ஐ.நா அறிவித்துள்ளது.

அதேநேரம் பான் கீ மூனுக்கு ஆலோசனை வழங்குவதற்காக அமைக்கப்பட்டுள்ள நிபுணர் குழுவிடம் இருந்து நன்மைகளை பெற்றுக்கொள்ளுமாறு அமெரிக்கா இலங்கையை வலியுறுத்தியுள்ளது.

அமெரிக்க இராஜாங்க திணைக்கள பேச்சாளர் மார்க் டோனர் இது தொடர்பில் நேற்று கருத்துரைத்துள்ளார். இதன் போது குறித்த நிபுணர் குழுவின் மூலம் இலங்கை அவர்களின் எதிர்ப்பார்ப்புகளுக்கான நன்மைகளை பெற்றுக்கொள்ளவேண்டும் என கேட்டுக்கொள்வதாக அவர் குறிப்பிட்டார்.