மலேசிய கடற்பரப்பில் கைதான தமிழர்களுக்கு நோர்வே, கனடா தஞ்சமளிக்கிறது.

வெளிநாடு ஒன்றில் அரசியல் தஞ்சம் கோரும் நோக்கில் படகொன்றில் புறப்படுகையில் மலேசிய கடற்பரப்பில் வைத்து அந்நாட்டு கடற்படையினரால் கைதுசெய்யப்பட்ட 75 இலங்கை தமிழர்களும் தமக்கு தஞ்சம் வழங்கக்கூடிய நாடொன்றுக்கு தம்மை அனுப்பி வைக்க நடவடிக்கை எடுக்க வேண்டும், உள்ளிட்ட மூன்று கோரிக்கைகளை முன்வைத்து கடந்த சில தினங்களாக உண்ணாவிரதம் மேற்கொண்டிருந்ததுடன் இவர்களின் கோரிக்கையை ஏற்றுக்கொள்வதாக மலேசிய அதிகாரிகள் உறுதியளித்ததை அடுத்து உண்ணாவிரம் கைவிடப்பட்டிருந்தது.

இவர்களின் கோரிக்கைகள் தொடர்பாக மலேசியாவிலுள்ள கனடா மற்றும் நோர்வே தூதரகங்களை மலேசிய அதிகாரிகள் தொடர்பு கொண்டதை அடுத்து அவ்விரு நாடுகளும் தஞ்சமளிக்க முன்வந்துள்ளதாக தகவல்கள் வெளியாகியுள்ளன.

மேற்படி அகதிகள் இலங்கை திரும்புவதை நிராகரித்துள்ளதாக மலேசியாவுக்கான இலங்கை உயர்ஸ்தானிகர் கலாநிதி டி .டி. ரணசிங்க தெரிவித்துள்ளார். இலங்கை தூதரகத்தின் அதிகாரிகளை சந்திப்பையும் அவர்கள் நிராகரித்துள்ளனர்.

சட்டவிரோதமாக படகொன்றின் மூலம் அவுஸ்த்ரேலியா நோக்கிச் சென்றுக் கொண்டிருந்த போது இவர்கள் மலேசிய கடற்பரப்பில் வைத்து கடந்த ஏப்ரல் மாதம் கைதுசெய்யப்பட்டனர். பெண்கள்,சிறுவர்கள் உள்ளிட்ட இந்த 75 பேரும் மலேசியாவின் கோலாலம்பூர் விமானத்திற்கு அருகில் உள்ள தடுப்பு முகாமில் வைக்கப்பட்டுள்ளனர்.