அமெரிக்க படைத்தளத்தில் துப்பாக்கிப் பிரயோகம் 13 படையினர் மரணம்.

அமெரிக்க டெக்சாஸ் படைத்தளத்தில் திடீரென வீறு கொண்ட படைவீரர் ஒருவர் சரமாரியாக துப்பாக்கிப் பிரயோகம் செய்ததில் 13 அமெரிக்கப்படை வீரர் மரணித்தனர். அதேவேளை 30 பேர் படுகாயமடைந்துள்ளனர். இந்தச் சம்பவம் அமெரிக்காவில் பலத்த பதட்டத்தை ஏற்படுத்தியுள்ளது.

துப்பாக்கிப் பிரயோகம் செய்தவர் 39 வயதுடைய நிடால் மாலிக் கசன் என்று தெரிவிக்கப்பட்டுள்ளது. இவர் அமெரிக்கப் படைத்துறையைச் சேர்ந்தவர், வேர்ஜினியாவில் பிறந்தவர், இவருடைய பெற்றோர் பாலஸ்தீனர்கள், எருசெலேமிற்கு பக்கத்தில் இவர்களுடைய சொந்த இடம் இருந்துள்ளது. இப்பகுதியில் உள்ள இமாம் கூறும்போது இவர் அங்குள்ள பள்ளிவாசலுக்கு தினசரி வருவதாகக் கூறினார். துப்பாக்கிப் பிரயோகம் செய்யும் முன்னர் இவர் இஸ்லாமிய உடையுடன் கடையொன்றுக்கு வந்து கோப்பி உட்பட காலை உணவை வாங்கிச் சென்றுள்ளார். மிகவும் சாதாரண மனிதராக இயல்பு வாழ்க்கை வாழ்ந்தவர் என்று கூறப்படுகிறது.

ஆனால் இவருடைய உறவினர் ஒருவர் கூறும்போது இவர் அமெரிக்கப்படை வீரர்களால் அடிக்கடி கேலி செய்யப்படுவதாகவும், இவருடைய பாலஸ்தீன பிறப்பு கேலியாக பார்க்கப்படுவதாகவும் தெரிவித்துள்ளார். அதேவேளை ஈராக்கிற்கு படை கொண்டு செல்வதை இவர் எதிர்த்துமுள்ளார்.