மகிந்தா தமிழ்மக்களைக் காப்பாற்றுவாரா? - விருகோதரன்.

ஈழ விடுதலைப் போராட்டம் தடம்புரண்டு தலைவர் விடுதலைப்போராட்டம் இடம்பெற்றுக்கொண்டிருக்கிறது. தமிழ்மக்களின் உரிமைப்போராட்டத்தினுள்
சிவபூசையில் கரடி நுழைந்தது போல் நுழைந்த பிரபாகரன் இன்று தன்னைப் பாதுகாக்க தன்னுடன் மனிதகேடயங்களாக நிற்கமறுக்கின்ற மக்களை தற்கொலைக்குண்டுதாரி கொண்டு தாக்கியழிக்கும் அளவுக்கு போராட்டத்தை மாற்றியமைத்திருக்கின்றான்.

புலிகளின் பாசையில் இப்போராட்டம் பரிணாமவளர்ச்சி கண்டிருக்கின்றதென எதைக் குறிப்பிடுகின்றார்கள் என்றால், தமிழ் ஈழ விடுதலைப் போராட்டம் எனவும், மக்களின், இனத்தின், சுதந்திரத்திற்கான விடுதலைப்போராட்டம் எனவும், மாவீரர்கள் மரணிப்பதில்லை: மக்களின் விடுதலைக்காக விதைக்கப்படுகின்றார்கள் எனவும் மூளை சலவை செய்யப்பட்டு கரும்புலிகள் ஆக்கப்பட்டார்கள். ஆனால் எந்த மக்களுக்காக தம்மை கரும்புலிகளாக்கிக் கொண்டார்களோ (போராளிகள்) அந்த மக்கள் மீதே இன்று கரும்புலித்தாக்குதல் மேற்கொள்ளும் அளவிற்கு அவர்களின் மூளையைச் சலவை செய்திருக்கிறான் பிரபாகரன் என்றால் அதுதான் புலிகளின் பாசிச போராட்ட பரிணாமவளர்ச்சியாகும்.

புத்தபிக்குகள் தொட்டு சிங்களக் கிராமங்களைத் தாக்கியழித்து, அந்த அப்பாவிப் பொது மக்களை சுட்டும் வெட்டியும் கொத்தியம் தீயிட்டுக் கொழுத்தியும் படுபாதகமாகக் கொலை செய்தார்கள். ஆனால் அது தமிழின அழிப்புக்கு எதிரான தாக்குதல் என்றும், நில ஆக்கிரமிப்புக்கெதிரான தாக்குதல் என்றும் நியாயம் கற்பிக்கப்பட்டது.

யாரிந்த கரும்புலி? எதற்காக இந்தத் தாக்குதல்? தாக்குதல் எவ்வாறு நியாயப்படுத்தப்படப் போகின்றது? இப்போராட்டத்திற்கு தமிழ்மக்கள் விரும்பியோ விரும்பாமலோ செய்த தியாகங்கள் யாவை?

கடலாலும் தரையாலும் சுற்றிவளைக்கப்பட்டுள்ள பிரபாகரனைப் பிடிப்பதென்பது அரசபடைகளுக்கு சில மணித்தியாலங்களில் முடித்துவிடக்கூடிய விடயம். ஆனால் பிரபாகரன் மனிதகுல விரோதி என்பதையும் அவன் அங்கு மனிதகேடயங்களாக பணயம் வைத்துள்ள மக்கள் இப்பந்தயத்தில் பலியாகிவிடக்கூடாது என்பதற்காகவும் அரசாங்கம் தன்னால் முடியுமான விட்டுக் கொடுப்புகளைச் செய்து வருகின்றது.

இன்று பிரபாகரன் படுதோல்வியடைந்துள்ளான் என்பதையும் அவன் தோற்கடிக்கப்பட்டு விட்டான் என்பதையும் அவனுக்கு சீர்வரிசை செய்து வந்த நோர்வே உட்பட பல நாடுகளும் ஏற்றுக்கொண்டுள்ளதுடன், மனிதாபிமானமற்ற வெல்ல முடியாத யுத்தத்தை முடிவுக்கு கொண்டுவந்து எஞ்சியுள்ள போராளிகளையும் அவன் மனிதகேடயங்களாக வைத்துள்ள 250,000 மக்களையும் விடுவிக்குமாறு கேட்டுக்கொண்டுள்ளன.

இன்று முழு உலகமே இவனது கொடுமைகளைக் கண்டித்து வன்னியிலுள்ள மக்களுக்காகக் கொடுக்கும் குரல், அம்மக்களின் காதுகளில் விழாது பிரபாகரன் தடுத்து வைத்திருந்தாலும் கூட அம்மக்களினால் எவ்வாறு இத்தனை சுமைகளையும் தாங்கமுடியும்? ஏறக்குறைய 15 மாதங்களுக்கு மேலாக இடம்பெற்றுவரும் உக்கிர சண்டைகளுக்குள் ஓட்டமும் ஒழிவுமாக இருந்த மக்கள் தற்போது கிட்டத்தட்ட 200 சதுர கிமீ நிலப்பரப்பினுள் ஆடுமாடுகள் போல் அடைக்கப்பட்டுள்ளதையும் , இச்சிறுநிலப் பரப்பையும் கூட புலிகளினால் தக்கவைத்துக் கொள்ள முடியாதென்பதையும் உணர்ந்த பின்பு தமக்கு பாதுகாப்பான இடங்களை நோக்கி நகர்வதில் என்ன தவறு?

இம்மக்கள் இப்பூமியில் பிறக்கும் போது வேலுப்பிள்ளையின் மகன் பிரபாகரன் சாகும் வரை அவனது உயிரை நாம் பாதுகாப்போம் என்று உறுதிபூண்டோ இங்கு வந்து பிறந்தார்கள்?

தனிநாடு எனும் ஓர் மாயயைக் காட்டி தமிழ்மக்களுக்கு பிரபாகரன் கொடுத்த துயரங்கள் உலகிலே எந்த மூலையிலும் இடம்பெற்றிராதவை. வன்னியின் குறிப்பிட்ட பிரதேசத்தினுள் உலகவெளிச்சம் தெரியாமல் கிணற்றுத்தவளைகளாக அடைத்து வைத்திருந்த மக்களை கட்டாய போர்ச்சேவையில் ஈடுபடுத்தினான். அவர்களது பொருளாதாரத்தைச் சுரண்டினான்.
அவர்கள் பெற்ற பிள்ளைகளை பலவந்தமாக கட்டாயப்படுத்திப் போருக்காக பெற்றுக்கொண்டான். மறுத்தவர்களை சித்திரவதைக் கூடங்களில் அடைத்தும், கொன்றும் கொடுமைபுரிந்தான்.

பிரபாகரன் தனது தோல்வியை தன் கண்முன் கண்;டு கொண்டுள்ளபோதும் மக்களை வாழ விடுவதாக இல்லை. ஓரு சிறிய நிலப்பரப்பினுள் ஒடுக்கப்பட்டுள்ள பிரபாகரன் தனது நாட்களை எண்ணிக்கொண்டிருக்கின்றான். இவ்விடத்தில் எனக்கு ஓர் விடயம் ஞாபகத்திற்கு வருகிறது. அது: கடைசித்தமிழன் இருக்கும்வரை தமிழீழ போராட்டம் தொடரும் என புலிகள் கூறி வந்திருக்கிறார்கள். கடைசித் தமிழன் இருக்கும் வரை பிரபாகரன் உயிரைக் காப்பாற்ற எத்தனிக்க வேண்டும் என்பதாகவே இன்றைய நிலைமை அதை அர்த்தப்படுத்துகிறது.

இனி;மேல் தனது ஆயுதபோராட்டத்தால் எதுவுமே சாதிக்கமுடியாதென்பதை பிரபாகரன் நன்கு உணர்ந்திருந்தும் தான் இன்னும் உயிர்வாழக்கூடிய சொற்ப காலங்களுக்காக ஏறக்குறைய 250,000 மக்களையும் எஞ்சியுள்ள கடைசிப் போராளிவரையும் பலி கொடுக்கத் திடசங்கற்பம் பூண்டு கொண்டு நிற்பதைக் கண்டும் பிரபாகரனை சூரியதேவனாகவும் தேசியத்தலைவனாகவும் மகுடம் சூடிநிற்கின்ற மக்கள் இன்னும் மௌனத்தை கலையாதது ஏன்?

சுதந்திரபுரம் தற்கொலைத்தாக்குதல் சொல்லும் செய்தி என்ன? இந்தத் தற்கொலையாளிக்கு மக்கள் பெரிதா? பிரபாகரன் பெரிதா?

சொல்லணாத்துயரங்கள் சுமந்த மக்கள் பிரபாகரனுடன் இருப்பதில் தமக்கு பாதுகாப்பில்லை என்ற உண்மையை உணர்ந்த பின்பு பாதுகாப்பு தேடிச் செல்கையில் அவர்களைச் சுட்டு வீழ்த்தியும், அவர்கள் நகர்கின்ற பிரதேசங்களில் ஆட்லறி nஷல்களை செலுத்தியும் கொன்றொழித்த பிரபாகரன் இன்று அவர்களை தற்கொலைக் குண்டுகள் மூலமும் கொன்றொழிக்க முற்பட்டுள்ளமை பிரபாகரனைப் போன்ற சர்வாதிகாரி உலகில் எந்த மூலையிலும் இல்லை என்பதைக் காட்டுகிறது.

வன்னி சுற்றிவளைக்கப்பட்ட போது அரசாங்கம் மக்களை விடுவிக்குமாறு புலிகளுக்கு வேண்டுகோள் விடுத்தது. அதற்கு செவிமடுக்காத பிரபாகரன் மாறாக தனது நம்பிக்கைக்குரியவர்களை இராணுவத்திடம் சரணடையுமாறு அனுப்பினான். அவர்கள் மூலம் நாசகார வேலைகளை செய்வதினூடாக தமிழ்மக்கள் மீது படையினரின் கெடுபிடிகளை அதிகரிக்கலாம் என்பதும், அக்கெடுபிடிகளை ஒன்றுக்கு பத்து மடங்காக்கி மக்களுக்கு காட்டுவதன் மூலம் மக்கள் காதில் தொடர்ந்தும் பூச்சூட்டலாம் என்பதும் திட்டமாகவிருந்தது.

ஆனால் பிரபாகரனது அத்திட்டம் தோல்வி கண்டுள்ளது. போர் நிறுத்த ஒப்பந்த நேரத்தில் வடகிழக்கின் வெளிப்பிரதேசங்களுக்கு நாசகார நோக்குடன் அனுப்பிவைக்கப்பட்ட புலிகள் யுத்தம் தொடங்கியவுடன் கையில் கிடந்தவற்றை சுருட்டிக்கொண்டு வெளிநாடுகளுக்கு சென்றது போல், பிரபாகரனால் அண்மையில் படையினரிடம் சரணடைய அனுப்பி வைக்கப்பட்ட புலிகளும் காலை வாரிவிட்டுள்ளனர்.இன்று படையினரிடம் சரணடைந்து வவுனியா இடைத்தங்கல் முகாமில் தங்கியுள்ள அப்புலிகள் வன்னியின் உண்மை நிலைமைகளை ஒப்புவித்துள்ளனர். குறிப்பாக தமக்கு வழங்கப்பட்டிருந்த தாக்குதல் இலக்குகளை தெரிவித்ததோடு தாம் தொடர்ந்தும் யுத்தத்தில் ஈடுபட விரும்பவில்லை: உயிர் வாழவே விரும்புகிறோம் எனவும் கூறியுள்ளனர்.

இவ்வாறு பிரபாகரனது இறுதி வியூகமும் படுதோல்வியடைந்த நிலையிலேயே இன்று பொதுமக்களைக் கொன்றொழித்து வருகின்றான். ஆக ஒட்டுமொத்தத்தில் அவன் இத்தனை காலமும் மேற்கொண்டுவந்த படுகொலைகள் யாவும் தமிழின விடுதலையை கொண்டதல்ல என்பதையும் அவனது தனிமனித இராட்சியத்தையும், தனது வாழ்க்கை நலன் சார்ந்தது என்பதையும் தமிழ்மக்கள் ஏற்றுக்கொண்டு, பிரபாகரனது பசப்பு வார்த்தைகளுக்காக இத்தனை காலமும் செய்து வந்த உதவிகளையும் வாபஸ் பெற்று ஒன்றுபட்ட இலங்கைக்குள் நாம் இலங்கையர் என வாழமுடியும் என்கின்ற மனப் பக்குவத்தை வளர்த்துக் கொள்ளவேண்டும்.

வன்னியில் புலிகளால் கொல்லப்படுகின்ற, வதைபடுகின்ற விதத்தைக் கண்ணுற்றுள்ள நாட்டின் ஜனாதிபதி அவர்கள் பிரபாகரன் ஒட்டுமொத்தத்தில் தமிழ், சிங்கள, முஸ்லிம் என்கின்ற வேற்றுமையின்றி தனது சுயநலத்திற்காக மனிதகுலத்தின் மீது பயங்கரவாத செயல்களை கட்டவிழ்த்திருக்கிறான் என்பதைக் கருத்தில் கொண்டு வன்னி மக்களை அவன் பிடியிலிருந்து காப்பாற்ற வேண்டும்.VIII