துப்பாக்கி சூட்டில் இளைஞன் பலி.

திருகோணமலை உப்புவெளி தேவாநகர் பகுதியில் இனந்தெரியாத ஆயுததாரிகள் மேற்கொண்ட துப்பாக்கி பிரயோகத்தில் தமிழ் இளைஞர் ஒருவர் கொல்லப்பட்டுள்ளார். உப்புவெளி தேவாநகர் சுனாமி வீடமைப்பு திட்டப் பகுதியிலேயே இந்தசம்பவம் நேற்று முன்தினம் மாலை 5.20 மணியளவில் இடம்பெற்றுள்ளது. சம்பவத்தில் சுனாமி வீடமைப்பு திட்டத்தில் வசித்து வந்த தர்மலிங்கம் சிவகுமார் (வயது 25) என்பவரே உயிரிழந்தவராவார். இது தொடர்பில் பொலிஸ் ஊடாக பேச்சாளரும் சிரேஷ்ட பொலிஸ் அத்தியட்சருமாகிய ரஞ்சித் குணசேகர தகவல் தருகையில் கூறியதாவது தேவாநகர் சுனாமி வீடமைப்பு திட்டம் அமைந்துள்ள பகுதிக்கு மோட்டார் சைக்கிளிலும் முச்சக்கர வண்டியிலும் வந்த இனந்தெரியாத ஆயுததாரிகள் சிலரே இந்த துப்பாக்கிப் பிரியோகத்தினை மேற்கொண்டு விட்டுத் தப்பிச் சென்றுள்ளனர். சம்பவத்தில் கொல்லப்பட்டவர் சுனாமி வீட்டுத் திட்டத்தில் வசித்து வந்த தமிழ் இளைஞர் என அவரது உறவினர்களால் அடையாளம் காணப்பட்டுள்ளது. குறித்த ஆயுததாரிகளின் துப்பாக்கிப் பிரயோகத்தின் போது அவ்விடத்திலேயே உயிரிழந்த இளைஞரின் சடலம் திருகோணமலை வைத்தியசாலையில் பிரேத அறையில் வைக்கப்பட்டுள்ளது.